| جہاں میں ہم کہیں رہیں ہماری آب و تاب ہو |
| ہمارے ساتھ جب چمن میں کِھل رہا گلاب ہو |
| محبّتوں کی سرزمیں میں روشنی ہو ہر جگہ |
| کہیں وہ آفتاب ہو کہیں وہ ماہ تاب ہو |
| ملیں ہمیں رفاقتیں محبّتیں عنایتیں |
| کتاب حکمتوں سے پُر ہو پیار جس کا باب ہو |
| کہانیاں سنی تھیں ہم نے ہجر کی وصال کی |
| یہاں تو اس کا عشق ہی ہمارا انتخاب ہو |
| ہیں آشیاں اجڑ گئے کہ پنچھیوں نے راہ لی |
| مرے وطن کی ہر گلی میں یوں لگے عذاب ہو |
| ستم رسیدہ سب ہوئے ہیں کام کیا کرے کوئی |
| کہ ہجرتوں کے واسطے قطار میں شباب ہو |
| پڑھا تھا تم نے جو سبق مروّتوں وفاؤں کا |
| کہیں اسے بھلا کے یہ نہ زندگی خراب ہو |
| خدا کرے کہ پھر سے تم کو راحتیں نصیب ہوں |
| تمہیں ہدایتیں ملیں جو رہنما کتاب ہو |
| طبیب وہ ملے تمہیں جو درد کی دوا کرے |
| وہ زخم مندمل کرے تمہارا ہم رکاب ہو |
| سوال اس سے کیا کریں سنیں وہ جو کہا کرے |
| تو اس کے ہر جواب پر کہیں کہ لا جواب ہو |
| چلے بھی آؤ میکدے تمہارے غم بھی دور ہوں |
| پلا رہا جو حوض پر حَسین اک شراب ہو |
| ہے طارق اب تو خوش ہوا سُنا تو سجدے میں گرا |
| ہے جب سے اس نے کہہ دیا تمہارا کیا حساب ہو |
معلومات