| رَہے ہَر دَم مِرے لَب پَر لَب و رُخسار کا نَغمہ |
| کبھی کِردار کا نَغمہ، کبھی گُفتار کا نَغمہ |
| وُہ جِس نے آنکھ سے دیکھا ہے اُن کا بے مِثل چہرہ |
| سُنایا اُس نے پِھر ہَر سُو تِرے دیدار کا نَغمہ |
| مدینے کی ہَوا چُھو لے تو دِل بے خُود سا رہتا ہے |
| سُناتی ہے صَبا جِس دَم تِرے دَربار کا نَغمہ |
| کَرَم اَیسا ہُوا مُجھ پَر، بَدَل ڈالی مِری قِسمت |
| مِرے لَب پَر ہُوا جاری دَر و دِیوار کا نَغمہ |
| جہاں بَھر کے قَصیدے ماند ہیں اُس کی نَظر میں سَب |
| جِسے آتا ہے آقا کے رُخِ اَنوار کا نَغمہ |
| عَتیقؔ اپنے قَلَم سے لِکھ ہَمیشہ عشق کا نغمہ |
| نبی ﷺ کی آل و اَصحابِ کرم کے پیار کا نَغمہ |
معلومات