| تم پیار کے مجرم کو سزا کیوں نہیں دیتے |
| نظروں سے جہاں بھر کی گرا کیوں نہیں دیتے |
| سنتے ہیں کہ آنکھوں کا نشہ مے سے سوا ہے |
| مخمور نگاہوں سے پلا کیوں نہیں دیتے |
| بے چین اکیلے میں جو رکھتی ہیں شب و روز |
| وہ یادیں تصوّر سے مٹا کیوں نہیں دیتے |
| آ جاؤں اچانک نہ کہیں آنکھوں کے رستے |
| آخر مجھے تم دل کا پتا کیوں نہیں دیتے |
| مرنے کی تمنّا ہے کہ جینے کی خلش ہے |
| تم چاہتے کیا ہو یہ بتا کیوں نہیں دیتے |
| پروانے تمنّائے شہادت لئے گھومیں |
| تم شمعِ محبّت کو جلا کیوں نہیں دیتے |
| پھونکی ہے نئی روح تمہیں زندہ کیا ہے |
| حسرت ہے جو مرنے کی بُھلا کیوں نہیں دیتے |
| طارِق جو ملاقات کا پیغام ہے آیا |
| تم در پہ کھڑا ہو کے صدا کیوں نہیں دیتے |
معلومات