ہمارے آنے سے دلچسپ یوں کہانی ہوئی |
پتہ چلا ہی نہیں ختم زندگانی ہوئی |
نظر پڑی جو کسی پر تو دل بھی وار آئے |
پھر اس کی نذر ہماری بھری جوانی ہوئی |
ہنوز چھوڑ نہ پائے شباب کی باتیں |
بدن پرانا ہوا روح کب پرانی ہوئی |
دکھائی دیتے ہیں جب لوگ اس جگہ مصروف |
تو مُڑ کے دیکھنا بھی پیار کی نشانی ہوئی |
قدم قدم پہ یہاں موڑ اک نیا آئے |
یہ زندگی نہ ہوئی یہ کوئی کہانی ہوئی |
نہ دیکھ پائے ابھی تک تو یہ جہاں بھی ہم |
کہ آگے چل دئے بس یونہی آنی جانی ہوئی |
مسیحا جن کے لئے ہو گئے تھے ہم بیمار |
وہ آئے پوچھنے اتنی تو مہربانی ہوئی |
خیال اُن کا نہیں آیا بے سبب طارق |
سنی ہے دل پہ جو دستک ہے نا گہانی ہوئی |
معلومات