| غزل |
| دَرد ہے تو فغاں ضروری ہے |
| آگ ہے تو دھواں ضروری ہے |
| وہ کہیں ہاں، تو ہاں ضروری ہے |
| وہ کہیں ناں، تو ناں ضروری ہے |
| ناز نخرے ہمارے دَم سے ہیں |
| حُسن کو قدر داں ضروری ہے |
| قیمتی چیز ، قدر داں کا حق |
| دِل نہ ہو رائیگاں ضروری ہے |
| قربتوں کے الگ بکھیڑے ہیں |
| فاصلہ درمیاں ضروری ہے |
| خود فراموش ہے بہت انساں |
| آئینہ قدر داں ضروری ہے |
| ہم ہوا پر سوار ہوں تب بھی |
| پاؤں میں پائے داں ضروری ہے |
| ِجس قَدر خیر خواہ اکٹھے ہیں |
| اَب تو اِک پاسباں ضروری ہے |
| دھوپ برسا رہی ہے انگارے |
| صاحبو۔ سائباں ضروری ہے |
| جھوٹ، سچ میں تمیز مشکل ہے |
| عشق کا امتحاں ضروری ہے |
| گرچہ ساتھی ہو ایک، مخلص ہو |
| دوستو ۔ کارواں ضروری ہے؟ |
| بجلیوں سے قفس نہیں جلتے |
| خس نہیں آشیاں ضروری ہے |
| جانئے کب زمیں سرک جائے؟ |
| سر پہ اِک آسماں ضروری ہے |
| بوجھ سے تھک گئے مرے شانے |
| سر کو اک آستاں ضروری ہے |
| زندگی کو فروغ ہے اس سے |
| مرگ ہو ناگہاں ضروری ہے |
| لوگ بیزار روزمرّہ سے |
| نت نئی داستاں ضروری ہے |
| شعر تفسیر کے بنا سمجھے |
| یار اِک ہم زباں ضروری ہے |
| فکر اور سوچ کی نمو کے لئے |
| شعر آتش فشاں ضروری ہے |
| پھر غزل خواں ہوا شہاب احمد |
| حَرفِ دِل کا بیاں ضروری ہے |
| شہاب احمد |
| ۶ دسمبر ۲۰۲۳ |
معلومات