| ملا کیا ہمیں دل سے دل کو بدل کر |
| جدا ہو گئے ساتھ کچھ دیر چل کر |
| تھے محتاط لیکن اُسے دیکھتے ہی |
| گیا دل یہ ہاتھوں سے اپنے نکل کر |
| ترے حسن کا جب تصور کیا ہے |
| غزل دل کے کاغذ پہ اتری مچل کر |
| تری یاد جب قریہٴِ جاں سے گزرے |
| تو رکھ دے مرا گلشنِ دل مسل کر |
| نہ میٹھے بنو اتنے کوئی نگل لے |
| نہ کڑوے بنو کوئی چل دے اگل کر |
| کبھی دل میں ابھرے جو خواہش گنہ کی |
| تو ایماں کی طاقت سے رکھ دو کچل کر |
| بدن کے رکن وزن میں ہیں مکمل |
| غزل بن گیا ہے وہ شعروں میں ڈھل کر |
| ابھی تو مزا زیست کا ہم نے پایا |
| ابھی تھوڑا رک جا نہ شور اے اجل کر |
| ملن کے ہی وعدوں سے بہلائے رکھا |
| کٹی عمر یونہی ہماری بہل کر |
| تری ناؤ لگتی نہیں کیوں کنارے |
| کبھی نا خدا دیکھ ساحل بدل کر |
| پلا دے محبت کے دو گھونٹ ساقی |
| بجھا تشنگی ہونٹ ہونٹوں سے مل کر |
| کٹی عمر رفتہ مشقت اٹھاتے |
| الہی حیاتِ سحاب اب سہل کر |
| بدلتے رہے خود کو ہم جس کی خاطر |
| وہ ملتا ہے ہم سے نگاہیں بدل کر |
| ہر اک سمت چھایا غبارِ عداوت |
| سحابِ محبت برس جا پگھل کر |
معلومات