| بیچ دیواریں تھیں ایسی کاٹتی تھیں رابطہ |
| جب سے دیواریں گریں اب بڑھ گیا ہے فاصلہ |
| جرس کی آواز سے کٹنے لگا ہے دل مرا |
| وہ ابھی آیا نہیں اور چل دیا ہے قافلہ |
| سوچتے ہو اس سے ان کا حق ادا ہو جائے گا |
| دے کے ان کو دال روٹی سر چھپانے کی جگہ |
| جان لیوا خامشی ہے اور بے چینی بہت |
| رونما ہونے کو ہے کوئی نیا اب حادثہ |
| میں وہ بنتا جا رہا ہوں جو مری منزل نہیں |
| میں ٹھٹھک کر رہ گیا دیکھا جو میں نے آئینہ |
| لاش کو میری گھسیٹا شاہ نے شمشان تک |
| خون سے میں نے بچھایا احمری سا راستہ |
| موسمِ طوق و سلاسل جبر و استبداد ہے |
| ڈھول کی آواز پر آیا نیا اک ضابطہ |
| اب تو ہجرت ہی مقدر ہوں وطن سے دربدر |
| سانس گھٹتا ہے فضا میں کوچ کا ہے فیصلہ |
| اے خدا تیرے جہاں انصاف کا فقدان ہے |
| میرا قاتل میرا منصف یہ ہے تیرا فلسفہ |
| میرے بچوں کا مقدر جس ملک سے منسوب ہے |
| اس کی حالت دیکھ کر دل پر پڑا ہے آبلہ |
| ہم نے کیا پایا یہاں کس جرم کی ہے یہ سزا |
| اپنی مٹی میں ہمیں ہی نہ ملی دو گز جگہ |
معلومات