| اوڑھ کر ہجر میں! غبار ہوا |
| سوگواری تھی، سوگوار ہوا |
| مجھ پہ پہلے تو تیرا وار ہوا |
| پھر میں حالات کا شکار ہوا |
| اک ہی رودادِ دل ہے جانِ من |
| بے طرح سے ذلیل و خوار ہوا |
| غالباً آج ہے وہ پیشِ لحاظ |
| مجھ پہ احسان یہ ادھار ہوا |
| عادتوں میں ہے ایک کارِ عذاب |
| بارہا دل پہ اعتبار ہوا |
| نوکری کی تھکن میں دن گزرا |
| شام میں تیرا انتظار ہوا |
| لطفِ قربت تو ٹھیک لیکن دل |
| سوچیے گر تو داغدار ہوا |
| جیسے انگارے بجھتے ہیں سو میں |
| وقت کے ساتھ بردبار ہوا |
| کیا ستم ہے کہ زیبؔ میرے لیے |
| ایک دروازہ تھا، دیوار ہوا |
معلومات