| پڑھ کے آیا ہے سبق کون وفاداری کا |
| یاں تو اپنوں سے ہوا خوف ہے غدّاری کا |
| لوگ نفرت کا سرِ عام سبق دیتے ہیں |
| کون سکھلائے سلوک ان کو رواداری کا |
| جھوٹ سُن سُن کے کسی شخص کا جاگا ہے ضمیر |
| کوئی بے ساختہ اظہار ہے بیزاری کا |
| ایک انسان ہی درپے ہوا انسانوں کے |
| کیسا منصوبہ ہے دنیا کی تبہ کاری کا |
| چاہنے والوں میں لکھا ہے فرشتوں نے ہمیں |
| یہ تو انعام ہے مخلوق کی غمخواری کا |
| حالِ دل کھول کے بتلاؤں گا تفصیل کے ساتھ |
| کوئی آیا ہے مسیحا مری بیماری کا |
| چوٹ جب دل پہ لگے زور سے آتی ہے صدا |
| عشق تو کام نہیں ہوتا ریا کاری کا |
| دید ممکن جو نہیں بات کبھی ہو اس سے |
| کوئی سامان تو ہو گا مری دلداری کا |
| پارسائی بھی نصیبوں سے عطا ہوتی ہے |
| سلسلہ ختم نہیں ہوتا گنہ گاری کا |
| طارق آثار قیامت کے نظر آتے ہیں |
| کس کو آئے گا خیال آپ کی بیداری کا |
معلومات