| مسکرا دیتا ہے ، سُن کر وہ بہانے میرے |
| ڈھانپ کر رکھے ہیں سب عیب خدا نے میرے |
| ٹال دیتا ہے مری بات ، سمجھ کر ناداں |
| ورنہ ہاتھوں میں وہ دے دیتا خزانے ، میرے |
| روز و شب اس کے ہی در پر جو پڑا رہتا ہوں |
| ڈھونڈ لیتے ہیں مرے دوست ٹھکانے میرے |
| سامنے سب کے وہ رسوا نہیں ہونے دے گا |
| کچھ نہ کچھ اس سے مراسم ہیں پرانے میرے |
| شمع جلتی رہی پروانے فدا ہوتے گئے |
| جان پیاری تھی جنہیں کب تھے ، سیانے میرے |
| وہ جو مہمان ہیں رونق کا سبب ہیں ورنہ |
| گھر کے خالی نظر آتے سبھی ، خانے میرے |
| میں نے اتنا ہی کہا تھا کہ محبَّت کر لو |
| دوست دشمن سبھی گاتے ہیں ترانے میرے |
| سوچتا ہوں کہ کروں یا نہ کروں کام کوئی |
| بیٹھے رہتے ہیں فرشتے جو سرہانے میرے |
| طارقؔ آزادئ اظہار کا اک دور ہے یہ |
| لوگ پڑھ پڑھ کے سناتے ہیں فسانے میرے |
معلومات