| جنوں کی آگ میں جلنا ہوا ہے کیوں لازم |
| کمالِ شوق میں مرنا ہوا ہے کیوں لازم |
| دہکنا حسنِ گلِ تازہ کی طرح لیکن |
| مثالِ کاہ سلگنا ہوا ہے کیوں لازم |
| شکستگی کی گرانی بجا سہی لیکن |
| خود اپنے سائے سے ڈرنا ہوا ہے کیوں لازم |
| میں کج ادا ہوں تو آپ اپنے روپ میں ہوں |
| کسی کے روپ میں ڈھلنا ہوا ہے کیوں لازم |
| ہمیشگی کی تمنا ہمیں تو تھی ہی نہیں |
| یہ بار بار کا مرنا ہوا ہے کیوں لازم |
| رہِ نجات اگر مستقیم تھی تو بتا |
| یہ پل صراط پہ چلنا ہوا ہے کیوں لازم |
| مثالِ جنتِ فردوس ہے تو واضح ہے |
| کہ ہم پہ گھر سے نکلنا ہوا ہے کیوں لازم |
معلومات