| لبوں کو سی کے ہر دم پیتا ہوں خونِ جگر اپنا |
| در و دیوار سے اب پھوڑتا ہوں یارو سر اپنا |
| کسے مجرم کہوں کس کو سزا دوں اے دلِ منصف |
| جلایا ہے میں نے خود اپنے ہی ہاتھوں سے گھر اپنا |
| ابھی ان کہکشاؤں سے بہت آگے گزرنا ہے |
| یونہی چلتا رہے بس شب کے اے تارو سفر اپنا |
| یوں دردِ دل سنانے کو فسانے ہیں بہت لیکن |
| اسے فرصت کہاں رکھنا ہے قصہ مختصر اپنا |
| کسی سے کیا گلہ رکھیں کسی سے کیا شکایت ہو |
| جسے آنا ہو آ جائیں کھلا رہتا ہے در اپنا |
| کوئی امید کیا رکھیں علاجِ دردِ الفت کی |
| کہ خود بھی اس مرض میں مبتلا ہے چارہ گر اپنا |
| گزرتے وقت کی دھن نے بھی دھندلائے نہیں منظر |
| ہرا ہوتا رہا پل پل وہ یادوں کا شجر اپنا |
| میں شیشہ ہوں سنا ہے تو بھی شیشوں کا مسیحا ہے |
| لو آیا ٹوٹ کے میں اب دکھا دے تو ہنر اپنا |
معلومات