| لگ رہا ہے آسماں اب آگ برسانے کو ہے |
| وہ جو ہے قہّار ظالم پر غضب ڈھانے کو ہے |
| ایسی گرمی ہے بلا کی اب یہی محسوس ہو |
| اس زمیں سے جیسے بس لاوا نکل آنے کو ہے |
| جو خدا کے گھر کو ڈھانے کے ہیں مجرم ایک دن |
| ظالموں کو پیسنے کی چکّی چل جانے کو ہے |
| لے کے طوفاں آئے گی مظلوم کی آہِ رسا |
| اب مکافاتِ عمل بھی قرض لوٹانے کو ہے |
| گر کے اسفل سافلیں میں کام یہ ایسے کریں |
| اک درندہ بھی انہیں دیکھے تو شرمانے کو ہے |
| بہہ رہا ہے خوں مسلمانوں کا تم خاموش ہو |
| کیا ہوا ایماں تمہارا وقت بتلانے کو ہے |
| ہے خدا دھیما غضب میں پر بڑا غیّور ہے |
| دیکھ لینا اس کی غیرت جوش میں آنے کو ہے |
| مسجدوں کو تم گراؤ توڑ دو قبروں کو بھی |
| بد دعا کوئی اثر اپنا تو اب لانے کو ہے |
| یادِ ابراہیم میں قُربانیاں کرنے نہ دو |
| خوں شہیدوں کا مگر اب رنگ دکھلانے کو ہے |
| کیوں نہیں خوفِ خدا بچ جاؤ اس کے قہر سے |
| شامتِ اعمال اک دن سامنے آنے کو ہے |
| ظالموں کی ایک مدّت تک ہوئی رسّی دراز |
| اب انہیں انجام تک تقدیر پہنچانے کو ہے |
| نیست و نابود ہوں گی طاقتیں دجّال کی |
| اب مسیحا کا علَم دنیا میں لہرانے کو ہے |
| چلچلاتی دھوپ میں بس اک شجر ہے سایہ دار |
| سائے میں اس کے جو آئے گا اماں پانے کو ہے |
| ہے یہ طارق کی نصیحت فائدہ ہو گا سُنو |
| اس طرف آؤ شجر یہ اب ثمر لانے کو ہے |
معلومات