| آ کہ اب آجا نظر اے جان و دل |
| جس سے پاتا ہے سکوں یہ مضمحل |
| جس کے عارض پر ہے پہرے دار تل |
| جس پہ شیدا ہے جہانِ آب و گل |
| کتنے ارماں دل میں سنبھالے ہوۓ |
| شہر میں آیا ہے دیوانہ ترا |
| جان و دل کرتا ہے یہ تجھ پر نثار |
| شمعِ سوزاں آج پروانہ ترا |
| آہ ! اے محبوب لیکن شہر میں |
| تیرا مجنوں دربدر مارا پھرا |
| لیلئ دلی سے رسم و راہ میں |
| کوچہ کوچہ ٹھوکریں کھاتا پھرا |
| کس سے امیدِ کرم رکھوں اے دل |
| کون ہے جو بے غرض چاہے مجھے |
| کس سے اظہارِ تمنا اب کروں |
| کون ہے جو جان و دل وارے مجھے |
| آخری امید بھی ٹوٹی مری |
| آہ ! اے دل اب کوئی چارا نہیں |
| اے دلِ محزوں کہیں تو اور چل |
| غم کے ماروں کو یہاں یارا نہیں |
| اٹھ کہ اے دل تیری محفل اور ہے |
| تیری لیلی تیری محمل اور ہے |
| حسن کی باہوں کا حاصل اور ہے |
| عشق کے ماروں کی منزل اور ہے |
معلومات