ہر صورت وچ سُبحان ڈِٹھا (تضمین بر کلامِ حضرت خواجہ غلام فرید رحمۃ اللہ علیہ "ہے عشق دا جلوہ ہر ہر جا")

ہر صُورت وچ سُبحان ڈِٹھا، سُبحان اللہ، سُبحان اللہ

ہر رُوحی رُوح رَحمان ڈِٹھا، سُبحان اللہ، سُبحان اللہ

آپے حُسن تے آپے عشق پیا، آپے آہو آپے مُشک پیا

آپے مجنوں آپ جانان پیا، سُبحان اللہ، سُبحان اللہ

بے رنگی وچ تنزیہ دَسے، ست رنگی وچ تشبیہ دِسے

ہر رُوپ بَہروپ پہچان لیا، سُبحان اللہ، سُبحان اللہ

اَوّل عین ہے آخر دا، تے ظاہر عین ہے باطن دا

ایہہ باطن عین عیان خُدا، سُبحان اللہ، سُبحان اللہ

اوہدی کرسی کُل جہان اُتے، اوہدے جلوے ہر اِمکان اُتے

اوہو سائیں تے سُلطان بڑا، سُبحان اللہ، سُبحان اللہ

کھڑا سدرہ تے جبریل بیا، ویکھے حیرت نال سبیل بیا

آکھے گھر والا مہمان تھِیا، سُبحان اللہ، سُبحان اللہ

مشہود ہے دیکھو وَجہُ اللہ، شاہد جس دا عَبدُ اللہ

مُکھ ویکھ کے ہر مَستان کِہا، سُبحان اللہ، سُبحان اللہ

جنہاں اپنی ذات دھیان کیتا، "اِنِّیْ" اثبات گیان کیتا

وچ وحدت بحر اشنان کیتا، سُبحان اللہ، سُبحان اللہ

جس جان نے خود نُوں جان لیا، پا صورت دا عرفان لیا

"مَا اَعْظَمْ شَانی" جان کِہا، سُبحان اللہ، سُبحان اللہ

تیرے اندر ہِن آیات بجا، نہیں بندیا تیری ذات فنا

"فِیْ اَنْفُسِھِمْ“ اعلان بقا، سُبحان اللہ، سُبحان اللہ

اللہ نُور زمین اسماناں دا، اوہدا رنگ ہے رنگ جہاناں دا

ماہی نُور تے رنگ رضوان اُہدا، سُبحان اللہ، سُبحان اللہ

ہے عشق دا زور تے شور الگ، کرے جندڑی دا ہر بھور الگ

چاڑھے سولی ایہہ خاصانِ صفا، سُبحان اللہ، سُبحان اللہ

اوہدے عشقے وچ غلطان تھئی، ایمان کُجا کُفران تھئی

میں کوجھی دا ایمان پیا، سُبحان اللہ، سُبحان اللہ

ہووے سیر اِلٰی تے سیر مَعَ، سنگ خواجہ فی آیات اِلٰہ

ہر منزل تے اوسان خطا، سُبحان اللہ، سُبحان اللہ

میرے خواجہ دی پہچان رضا، اوہدی ہستی ہے بُستانِ وفا

ایہہ غُلام کرے دل جان فدا، سُبحان اللہ، سُبحان اللہ