| “کچھ خواب خریدے تھے آنکھوں کی تجارت سے” |
| محروم ہوئے لیکن یوسف کی زیارت سے |
| دشوار تو ہوتا ہے لفظوں میں بیاں کرنا |
| پڑھ لیتے ہیں لوگوں کو چہروں کی عبارت سے |
| پہلا سا طبیعت میں ہیجان نہیں باقی |
| جذبات پگھلتے تھے سانسوں کی حرارت سے |
| سپنوں میں کبھی آ کر وہ دیکھا کئے مجھ کو |
| سمجھائے یہ کون اس کو باز آئے شرارت سے |
| الجھی ہوئی زلفوں کو وہ آپ ہی سُلجھا لیں |
| ہم روک رکھیں خود کو ڈرتے ہیں جسارت سے |
| کہہ دیں جو نہیں اچھا غیروں سے ملا کرنا |
| محفل سے اٹھاتا ہے ہم کو ہی مہارت سے |
| الزامِ محبّت میں گر جُرم ہوا ثابت |
| کیوں دیکھے کوئی ہم کو اس طرح حقارت سے |
| غالب ہے جنوں آخر کیوں ہوش کی دنیا پر |
| ہوتا ہے جو عشق اندھا دیکھے وہ بصارت سے |
| ہو جائے سفر مشکل گر دیتا ہے زادِ راہ |
| مایوس نہیں کرتا خوش کر دے بشارت سے |
| ظاہر کے لباسوں پر کب اس کی نظر طارق |
| نزدیک وہ آنے دے بس دل کی طہارت سے |
معلومات