| جنوں کی بارگاہ میں بصد جلال مسترد |
| محبتوں کے بر خلاف ہر سوال مسترد |
| عدم وجود رونقِ جہان کی دلیل ہے |
| سو کر دیا زوال کے بنا کمال مسترد |
| نہ دین کو خطر کوئی نہ ڈر ہو جان و مال کا |
| تو سب جدال مسترد ہے ہر قتال مسترد |
| نہیں جو تیرے حسن میں اگر حیا کی شوخیاں |
| تو پھر حضورِ دل میں ہے ترا جمال مسترد |
| نہ جانے کتنی صورتیں بنیں مٹیں مٹیں بنیں |
| مگر یہ دل نہ کر سکا ترا خیال مسترد |
| ہے فیصلہ، ہر ایک رائے آپ کی، جو کر سکے |
| مخالفت کا حوصلہ، کسے مجال مسترد |
| تمام عمر ہم نے اس ادھیڑ بن میں کاٹ دی |
| کبھی فراق مسترد کبھی وصال مسترد |
| ہو ایک کیلئے تو رقص و مستیاں قبول ہیں |
| مگر دوئی کے رنگ رد دم و دھمال مسترد |
| حبیب جاؤ گے کہاں بروز حشر جب وہاں |
| کرے گا تیرا جھوٹ تیرا بال بال مسترد |
معلومات