| پھر ترا اس گلی میں جانا ہو |
| جس میں محبوب کا ٹھکانہ ہو |
| تُو یہ چاہے وہ بام پر آئے |
| وہ ترے سامنے روانہ ہو |
| جاتے جاتے رُکے وہ کچھ لمحے |
| تجھ کو گویا گلے لگانا ہو |
| مسکرا کر تجھے وہ یوں دیکھے |
| جیسے تُو قیمتی خزانہ ہو |
| تجھ کو محسوس ہو کہیں دل میں |
| اس سے رشتہ کوئی پرانا ہو |
| تیرے احباب رشک سے دیکھیں |
| اور حاسد ترا زمانہ ہو |
| ہر قدم امتحان ہو تیرا |
| زیست بھی اس کا اک بہانہ ہو |
| وہ وہاں پر پہنچ ہی جاتا ہے |
| جس جگہ جس کا آب و دانہ ہو |
| ہر قدم سوچ سوچ کر دھرنا |
| کیا خبر کس نے آزمانا ہو |
| روٹھنے کی نہ سوچنا اس سے |
| اس کو مشکل نہ پھر منانا ہو |
| طارق اس کی گلی سے ہو آئیں |
| جانے پھر جانا یا نہ جانا ہو |
معلومات