| غزل |
| مسکراتے ہوئے لب دیکھ مچل جاتا دل |
| اک شکن ہوتی جبیں پر تو دہل جاتا دل |
| خوب سنجیدہ مزاجی سے محبت کی ہے |
| کوئی لونڈا تھا میں اُوباش بدل جاتا دل |
| گوشے گوشے پہ بدن اس نے ترے بوسے لئے |
| سخت پتھر سے بنا ہوتا پگھل جاتا دل |
| رات پندارِ محبت نے بچایا کافر |
| شوخ قدموں کی روانی میں کچل جاتا دل |
| نرم رخسار وہ سینے پہ نہ رکھتی کل شب |
| دھڑکنیں تیز تھیں سینے سے نکل جاتا دل |
| اب تو ہر وقت یہ قربت کے تعلق مانگے |
| اوّل اوّل ترے وعدوں سے بہل جاتا دل |
| شیخ گر شوخ کے کوچے میں قدم رکھ لیتے |
| پھر سنبھالے نہ سنبھلنا تھا پھسل جاتا دل |
| رنج ہوتا ہے رقیبوں کے دلوں کا دلبر |
| دیکھتے آپ کو پہلو میں تو جَل جاتا دل |
| قیمتی چیز ہے تاکید تبھی تو کی تھی |
| رنج رہتا تمھیں ہاتھوں سے پھسل جاتا دل |
| سادگی دیکھ شہاب اُن کی کھلونا سمجھیں |
| لطف آتا کبھی ہاتھوں سے پھِسل جاتا دل |
| شہاب احمد |
| ۱۰ دسمبر ۲۰۲۱ |
معلومات