| زباں پر آئی باتیں کس نے روکی ہیں بتاؤ تو |
| مجھے تم اچھےّ لگتے ہو ذرا نزدیک آؤ تو |
| بڑی دلکش ہیں رعنا ہیں دلوں کی بستیاں ہمدم |
| عیاں ہو جائے گا خود ہی کسی کو دل میں لاؤ تو |
| بہت مغموم لگتے ہو کہو کیا بات ہے جاناں |
| کسی کو مان کر اپنا دلی دُکھڑے سناؤ تو |
| مرے کمرے میں آویزاں تری تصویر ہے دلبر |
| کسی دن دیکھ لو آ کر کبھی تشریف لاؤ تو |
| محبت میں خدائے کبریا کا نور بستا ہے |
| کبھی تخلیقِ خالق کو صنم اپنا بناؤ تو |
| سنا ہے مَیں نے تم کو دعوائے ترکِ تعلّق ہے |
| کبھی ہمّت کرو اور آ کے مجھ کو خود بتاؤ تو |
| دلوں کے بُعد کی اکثر وجہ مالی تفاوت ہے |
| مٹا کر اس خباثت کو نئی تمثیل لاؤ تو |
| سنا ہے شوقِ موسیقی بھی ہے کچھ خواجہ صاحب کو |
| اگر ایسا ہے تو یارو کبھی محفل سجاؤ تو |
معلومات