| غازۂ عارضِ گلنار ہے یا رنگِ شفق |
| چشم میگوں ہے یا پھر بادۂ گلرنگ کوئی |
| جنبشِ لب یا کوئی ناز سے کھلتا ہوا گل |
| خوشبوئے فصلِ گل و بار یا گیسو کی مہک |
| ماہ و پروین صفت ، اوج مکیں ، زہرہ جبیں |
| ہم کہ آزردہ دل و جان جگر تھام چلے |
| یوں خیال آتا ہے جب جانِ وفا شام ڈھلے |
| جب کبھی ذکر ترا ہوتا ہے محفل میں مری |
| سانس تھمتی ہوئی لگتی ہے رگیں پھٹنے کو |
| دھڑکنیں تیز ہوئی جاتیں ہیں سینے میں مرے |
| سسکیاں بن کے تڑپتا ہے مرا دردِ جگر |
| دل کے آنگن میں اتر آتے ہیں بادل غم کے |
| اور آنکھوں سے برستی ہیں تری یادیں صنم |
| اس گھڑی اے ستم و جور و جفا کے پیکر |
| اپنی حالت کو جو دیکھوں تو یہ آتا ہے خیال |
| اک فقط میں ہی نہیں مجھ سے کئی اور دیوانے ہوں گے |
| شامِ تنہائی میں جو اشکوں کا پیالہ تھامے |
| اپنے سینوں میں جو معصوم سا جذبہ لیکر |
| بر سرِ بزم کہیں گوشۂ تنہائی میں |
| چپکے چپکے سے کہیں آہیں جو بھرتے ہوں گے |
| شاہراہوں پہ کھڑے کوچہ و بازار میں گم |
| غم کے مارے جو سرِ راہ سسکتے ہوں گے |
| بستر مرگ پہ ہر روز تڑپتے ہوں گے |
| زیست کے ہاتھوں شب و روز ہی مرتے ہوں گے |
| پر اے مغرور و جفا کیش و ستم پیشہ صنم |
| تو نے ان مجنوں و فرہاد پہ کیا ڈھائے ستم |
| جن کی تقدیر بجز جور و جفا کچھ بھی نہیں |
| جن کی تصویر بجز صدق و وفا کچھ بھی نہیں |
| کتنی شامیں تری یادوں میں چراغاں کرکے |
| کتنی راتیں تری امید میں جاگے ہوں گے |
| کتنی صبحوں کو ترے نام کا کلمہ پڑھ کر |
| اپنے خوابوں کے نشیمن کو سجائے ہوں گے |
| آہ کیا لوگ تھے جو تیرے گرفتار ہوئے |
| شوخئِ حسنِ رخِ یار کے بیمار ہوئے |
| شوقِ دیدار میں مقتول سرِ دار ہوئے |
| ہائے ان سادہ مزاجوں کی صداقت پہ نثار |
| جو بھی اس راہ میں آئے ہیں بصد صدق و یقیں |
| ابنِ آدم کی روایات محبت کے نشاں |
| یوسف مصر کی بے داغ جوانی کے امیں |
| لیکن ان شوق کے ماروں کو بھلا کیا معلوم |
| دلکش و ہوشربا چشم سیہ گوں کا فسوں |
| فتنہ سامانِ حرم ، عشوہ گر و غمزہ فروش |
| خواہرِ شوخ زلیخا کا حسیں دامِ فریب |
| بنتِ حوا کے حسیں روپ کا رنگین قفس |
| اور اس زلفِ پریشاں کی وہ بھینی سی مہک |
| شوق انگیز و سحر خیز وہ فطرت کی لچک |
| ہائے ان شوخ اداؤں کا وہ اندازِ ستم |
| وہ حسیں جسم و حسیں روح و حسیں ذات و صفات |
| جس کی سانسوں سے چمن زار مہک اٹھتا ہے |
| لالہ و نرگس و گلزار دہک اٹھتا ہے |
| بلبلِ زمزمہ پرداز چہک اٹھتا ہے |
| پھر بھی محرومِ تمنا تھے جو محروم رہے |
| اپنے ممدوح کی نظروں میں وہ مذموم رہے |
| ہاں مگر اے دلِ محرومِ یقیں ، جانِ حزیں |
| یادِ ایام کے ہر زخم فراموش کیے |
| ظلمتِ شب میں دل و جاں کو فروزاں کرکے |
| شامِ تنہائی میں رہتا ہوں چراغاں کرکے |
معلومات