| سر بکف تو سر بلند اے حافظِ ناموسِ دیں |
| پاسبانِ عظمتِ رفتہ جسارت آفریں |
| ملتِ ختمُ الرسل کا فخر اے روشن جبیں |
| آفریں صد آفریں اے ساکنِ خلدِ بریں |
| ذوقِ وحدت سے ترے ہم صاحبِ ایمان ہوں |
| اے شہیدِ ناز تجھ پر ملتیں قربان ہوں |
| پیکرِ عزم و جنوں تو خوگرِ صبر و رضا |
| حاملِ شوقِ شہادت صاحبِ مہر و وفا |
| تیرے دم سے تھا جہاں میں شورشِ محشر بپا |
| تجھ سے ہی آباد تھا اے مردِ حر ! دشتِ وغا |
| دردِ ملت سے ترے ہم مومنِ میدان ہوں |
| اے شہیدِ ناز تجھ پر ملتیں قربان ہوں |
| دل کیا تیرا دل رہا کاشانۂ بسمل رہا |
| محفل آرا بھی رہا بیگانۂ محفل رہا |
| لیلیٔ قدس و فلسطیں سے سجا محمل رہا |
| رنج و غم ، درد و الم سے شاد تیرا دل رہا |
| تیری عظمت پر فدا اے رشکِ دل سو جان ہوں |
| اے شہیدِ ناز تجھ پر ملتیں قربان ہوں |
معلومات