| مرے روبرو وہ نگار آ گیا |
| تو بے تاب دل کو قرار آ گیا |
| ہنسا وہ تو کلیوں کو جوبن ملا |
| گلوں پر پیامِ بہار آ گیا |
| نگاہوں سے مستی چھلکنے لگی |
| بنا مے پیے ہی خمار آ گیا |
| مرے ہاتھ پر ہاتھ اس نے رکھا |
| تو جذبوں پہ کیسا نکھار آ گیا |
| سمٹتے گئے درمیاں فاصلے |
| وہ بانہوں کا لے کر حصار آ گیا |
| لبوں سے لبوں کو جو اس نے چھوا |
| لہو میں مرے اک شرار آ گیا |
| یہاں شب گزیدہ اداسی رہی |
| وہاں روشنی کا دیار آ گیا |
| جھکا سر جو اس کے قدم پر مرا |
| مری عاشقی میں وقار آ گیا |
| چلا تیرِ مژگاں یہاں اس طرح |
| کہ المیر جیسا شکار آ گیا |
معلومات