| دل کے گوشے کو جگا لیں گے، تم آؤ تو سہی |
| غم کے بادل بھی ہٹا لیں گے، تم آؤ تو سہی |
| تیری آہٹ سے ہی جاگ اُٹھے گا سویا موسم |
| پھول رستے میں بچھا لیں گے، تم آؤ تو سہی |
| ہم نے رکھے ہیں سنبھالے ہوئے ارماں کب سے |
| تم پہ ہم سارے لٹا لیں گے، تم آؤ تو سہی |
| جو بھی ٹوٹے ہیں مرے خواب، چنیں گے ہم پھر |
| ان کو پلکوں پہ سجا لیں گے، تم آؤ تو سہی |
| پردۂ نفس جو حائل ہے نگاہوں کے بیچ |
| اس کو اشکوں سے ہٹا لیں گے، تم آؤ تو سہی |
| راہِ وحدت میں رکھیں گے جو قدم آہستہ |
| خود کو مٹی میں ملا لیں گے، تم آؤ تو سہی |
| دل کے کعبے کو سنواریں گے تری یادوں سے |
| اس میں جلوہ بھی بسا لیں گے، تم آؤ تو سہی |
| مَیں کی دیوار گرا کر تری جانب ہوں رواں |
| خاک کو عرش بنا لیں گے، تم آؤ تو سہی |
| رقص میں ڈوب کے جب نام ترا لیں گے ہم |
| وقت کی حد بھی مٹا لیں گے، تم آؤ تو سہی |
| عشق دریا ہے، ہمیں قطرہ نہیں رہنا اب |
| خود کو لہروں میں بہا لیں گے، تم آؤ تو سہی |
| ہجر کی رات میں بھی وصل کا امکاں نکلے |
| درد کو ساز بنا لیں گے، تم آؤ تو سہی |
| ہر نفس نام ترا، ہر نظر آئینہ ہو |
| خود کو تجھ میں ہی چھپا لیں گے، تم آؤ تو سہی |
| چادرِ فقر پہن لیں گے خوشی سے ہم بھی |
| تاج دنیا کا گرا لیں گے، تم آؤ تو سہی |
| ہم تو عادلؔ اسی رستے میں فنا ہو جائیں |
| خود کو ہستی سے مٹا لیں گے، تم آؤ تو سہی |
معلومات