مسکراتا ہے مرے غم پہ جہاں ملتا ہے |
دل پہ یادوں کا اگر کوئی نشاں ملتا ہے |
۔۔۔۔۔۔۔۔۔۔۔۔۔۔۔۔۔۔۔۔۔۔۔ |
میَں بھی بھٹکی ہوئی یادوں کی کوئی گرد ہوں اور |
وہ بھی گزرا ہوا موسم ہے کہاں ملتا ہے |
۔۔۔۔۔۔۔۔۔۔۔۔۔۔۔۔۔۔۔۔۔۔۔ |
اس لئے لوگ کہانی پہ یقیں کرتے ہیں |
ایک دوجے سے بہت اپنا بیاں ملتا ہے |
۔۔۔۔۔۔۔۔۔۔۔۔۔۔۔۔۔۔۔۔۔۔۔ |
ایسا لگتا ہے دیا سامنے خورشید کے ہو |
مُجھ پہ ہنستے ہیں ستارے وہ جہاں ملتا ہے |
۔۔۔۔۔۔۔۔۔۔۔۔۔۔۔۔۔۔۔۔۔۔۔ |
خلقتِ شہر جسے خود میں گنا کرتی ہے |
وہ مری ذات کے پیندے میں نہاں ملتا ہے |
۔۔۔۔۔۔۔۔۔۔۔۔۔۔۔۔۔۔۔۔۔۔۔ |
دل میں بس خوفِ جدائی کی ہوا چلتی ہے |
اب محبت کا زمانہ بھی کہاں ملتا ہے |
۔۔۔۔۔۔۔۔۔۔۔۔۔۔۔۔۔۔۔۔۔۔۔ |
ایک خُوشبو کا جہاں آج بھی قائم ہے کہیں |
ایک پھولوں کا نگر ہے وہ وہاں ملتا ہے |
۔۔۔۔۔۔۔۔۔۔۔۔۔۔۔۔۔۔۔۔۔۔۔ |
اُس کی آنکھوں میں سرِ شام اتر جاتا ہوں |
اس کی چاہت کا مجھے روز سماں ملتا ہے |
۔۔۔۔۔۔۔۔۔۔۔۔۔۔۔۔۔۔۔۔۔۔۔ |
خواب جلتے ہیں مرے دل کے نہاں خانوں میں |
اب تو مانی مری آنکھوں میں دھواں ملتا ہے |
معلومات