| سیراب تا کرے زمیں ، دریا بنا دیا |
| دستور ، آسمان سے اترا ، بنا دیا |
| جب یہ زمیں بہشت تھی بھیجا گیا یہاں |
| انساں نے دیکھ اس کو بھی ہے کیا بنا دیا |
| مقصد حیات کا تھا ، تعلّق خدا کے ساتھ |
| پھر کس نے اس کو حاصلِ دنیا بنا دیا |
| وہ چاہتا تھا اس سے محبّت کرے کوئی |
| خود کو محبّتوں کا ہی شیشہ بنا دیا |
| دنیا کو امتحان بنایا خدا نے تھا |
| پھر کس نے اس کو ایک تماشا بنا دیا |
| بادل اتار کر کہیں دریا بہا دیئے |
| سورج کہیں پہ روک کے صحرا بنا دیا |
| دل میں رکھی تلاش خود اپنی ہی ذات کی |
| پھر ساری کائنات کو چہرہ بنا دیا |
| طارقؔ بہانہ دیکھنے کا جب کیا تلاش |
| تب اُس نے اپنے سامنے پردہ بنا دیا |
معلومات