| سوکھ کر جو کبھی جھڑا ہی نہیں |
| پھول ایسا کوئی کھلا ہی نہیں |
| گھر میں اپنے ہے آئینہ ہی نہیں |
| آجکل خود سے رابطہ ہی نہیں |
| پڑھ رہا ہوں قضاۓ عمری یوں |
| آ نہ جاۓ کہیں قضا ہی نہیں |
| عمر بھر جس پہ میں کہ چلتا رہا |
| تھا وہ منزل کا راستا ہی نہیں |
| آہ پہنچی نہ آسمان تلک |
| نالہ اپنا ہوا رسا ہی نہیں |
| اس طرح مل رہا ہے وہ ہم سے |
| جیسے پہلے کبھی ملا ہی نہیں |
| ختم بھی ہو گیا سفر میرا |
| میں تو گھر سے مگر چلا ہی نہیں |
| موت بھی آ گئی ذرا سے میں |
| دل ہمارا ابھی بھرا ہی نہیں |
| حادثے رونما ہوۓ ایسے |
| کچھ ہوا جیسے ماجرا ہی نہیں |
| ہجر کیا چیز ہے میں کیا جانوں |
| تم سے مل کر ہوا جدا ہی نہیں |
| توڑ کر رکھ دیا ہے دل اس پر |
| بن گۓ جیسے کچھ کیا ہی نہیں |
| وہ مرا درد کیا بھلا جانے |
| درد سے ہے جو آشنا ہی نہیں |
| بج رہے ہیں غموں کے ساز مگر |
| دل کے نغموں کی ہے صدا ہی نہیں |
| ظلم کرتے ہیں لوگ یوں جیسے |
| اس جہاں کا کوئی خدا ہی نہیں |
| جنگ کرنے کی ان سے ٹھانی تھی |
| پھر ہوا یوں کہ کچھ ہوا ہی نہیں |
معلومات