| پوچھتے ہو مجھ سے تم ، کیوں یہ کام کرتے ہو |
| زندگی تمہاری ہے میرے نام کرتے ہو |
| وصل کی جو دعوت ہے ہجر کی تڑپ بھی ہے |
| حسن جب دکھاتے ہو عشق عام کرتے ہو |
| زندگی سفر میں ہے راستہ بھی مُشکل ہے |
| ہر قدم حساب اِس پر صبح شام کرتے ہو |
| خوف دل پہ طاری ہے ہر طرف اندھیرا ہے |
| روشنی کا ایسے میں انتظام کرتے ہو |
| رونقیں ہیں محفل ہے یا ہے میری تنہائی |
| یاد میں مری آ کر پھر قیام کرتے ہو |
| حرف خوبصورت ہیں لفظ مسکراتے ہیں |
| چاندنی کی چھاؤں میں جب کلام کرتے ہو |
| عشق جیت جاتا ہے عقل محوِ حیرت ہے |
| آگہی کی دُنیا میں جب سلام کرتے ہو |
| مجھ سے دُور ہو کر بھی میرے پاس ہوتے ہو |
| یہ عجب کرشمہ بھی تُم مدام کرتے ہو |
| یوں تو مان جاتے ہو اپنی ٹھان لو تو پھر |
| اس کو کر گزرنے کا اہتمام کرتے ہو |
| فکر مند رہتا ہے جب سے تم نے پوچھا ہے |
| طارق اب جو کہتے ہو کیا تمام کرتے ہو |
معلومات