| روند کر عرشِ جاں مصلحت آ گئی |
| چھوڑ کر کہکشاں مصلحت آ گئی |
| بیچ کچھ بھی نہ تھا اور پھر ایک دن |
| دونوں کے درمیاں مصلحت آ گئی |
| ہم وہاں ہیں جہاں صلح ممکن نہیں |
| ہم جہاں تھے وہاں مصلحت آ گئی |
| سارے سیراب جوتوں میں بھر بھر پیے |
| بہرِ تشنہ لباں مصلحت آ گئی |
| جان چھوٹی بہ مشکل تھی کم بخت سے |
| پھر سے ہو کر جواں مصلحت آ گئی |
| ہوتے ہوتے گنہگار ہم بچ گئے |
| یاد سن کر اذاں مصلحت آ گئی |
| شاعری تو ہے دل کی حکایت کا نام |
| شاعری میں کہاں مصلحت آ گئی |
| بے دھڑک بات کرتا تھا میں ، پھر مجھے |
| قسمتِ دشمناں مصلحت آ گئی |
| مصلحت کا ادا کر قمرؔ شکریہ |
| تجھ کو دینے اماں مصلحت آ گئی |
| قمرآسیؔ |
معلومات