| کرتی ہے فضا رقصِ تماشہ مرے آگے |
| رہتا ہے یہ عالم تہ و بالا مرے آگے |
| خاموش ہیں سب رنگِ تمنا مرے آگے |
| بکھرا ہے سکوتِ شبِ یلدا مرے آگے |
| اِک نکتہِ حق ہو گیا ظاہر مرے ہوتے |
| حیرت میں ہے پیمانہ خرد کا مرے آگے |
| وہ رند ہوں جُھکتی ہے صراحی مرے حق میں |
| وہ شعر ہوں جو کُھلتا ہے تنہا مرے آگے |
| اِک سِحْر ہے انگشت کا کٹنا مِرے نزدیک |
| اِک مضحکہ ہے حسنِ زلیخا مرے آگے |
| کرتا نہیں ہے بات کوئی بھی مرے پیچھے |
| چلتا نہیں ہے زور کسی کا مرے آگے |
| مجھ کو تپشِ عشق نے سُلگائے رکھا ہے |
| کیا آتشِ نمرود کا جلنا مرے آگے |
| جب حرصِ جہاں دل سے مِرے ختم ہوئی تو |
| اُس ذات کے جلوے ہوے کیا کیا مرے آگے |
| پُر لطف تھی، اعلی تھی، فقط بے خَبَری تک |
| جب جان لیا ہیچ ہے دنیا مرے آگے |
| میں دیکھ چُکا سر بسر احوالِ گلستاں |
| ہر غنچہ و گلچیں ہے فسردہ مرے آگے |
| مَیں لاکھ کہیں بھاگ چَلوں گھوم گُھما کے |
| آ جاتی ہے تیری ہی تمنا مرے آگے |
| کُھل جاویں کئی بھید سکوں پاویں دل و جاں |
| غالب کا جو کوئی پڑھے مصرعہ مرے آگے |
| اک شعلہِ وصل اب کہ بھڑک اُٹّھا ہے دل میں |
| ہے آتشِ سیال سراپا مرے آگے |
| تھا مجھ کو ہنر حُسنِ طلب کا مِرے ہم چشم! |
| وہ بندِ قبا کیسے نہ کُھلتا مِرے آگے |
| اب ضعف کے عالم میں پہنچ میں نہیں آتا |
| رکھ دے کوئی پیمانہِ صہبا مِرے آگے |
| ہوتی ہے قَدَم رَن٘جَہ یہاں فصلِ بہاراں |
| پھر ٹوٹ گِرے گی مِری توبہ مِرے آگے |
| کیوں تم نے گرائی ہے دلِ خستہ پہ بجلی |
| کیوں تم نے کہا غیر کو اچھا مرے آگے |
| معلوم ہو جس بزم میں مسند نشیں ہیں آپ |
| اُس بزم میں دل جائے ہے میرا مِرے آگے |
| جُز سجدے کے اِمکاں نہیں رہتا کوئی شاہدؔ |
| آئے جو خدا بن کے وہ بندہ مِرے آگے |
معلومات