| 1۔4۔2024/17۔7۔2022 |
| غزل |
| کہا کسی نے ہوئے ظلم کا سبب پتھر |
| مگر تھا دل کا اندھیرا، نہ تیرہ شب پتھر |
| جواب ان کو دعاؤں کا کیسے ملنا تھا |
| بنا لئے تھے انہوں نے تو اپنے رب پتھر |
| جو وہ نہ مل سکا ان کو تو سجدہ کرنے کو |
| پجاری لے گئے تھے اس کے گھر کے سب پتھر |
| نہ جانے کیسے یہ قسمت پہ ہوں اثر انداز |
| کہ پہنے جاتے ہیں انگلی میں اب غضب ، پتھر |
| اگرچہ واقعہ گزرے یہ ہو گئیں صدیاں |
| کہو تو گریہ و زاری سنو بہ لب پتھر |
| جُدائی ایسی ہوئی باپ کی تھی بیٹے سے |
| کہ انتظار میں آنکھیں ہوئی تھیں تب پتھر |
| سوال جب ہوا تھا بھائیوں سے یوسف کا |
| جواب اس کو بھلا دے سکے تھے کب ، پتھر |
| پکارتی تھی اَحد کی صدا ، زبانِ بلال |
| گھسیٹا جاتا تھا سینے پہ رکھ کے جب پتھر |
| احد پہاڑ کے وہ خوش نصیب تھے کتنے |
| رسولِ پاک کے آ ئے تھے جو عقب ، پتھر |
| جہاں نماز پڑھائی گئی تھی نبیوں کو |
| نشاں ہیں قبلۂ اوّل کے با ادب ، پتھر |
| طواف کرنے گیا جب حرم تو دیکھ لیا |
| وہاں تو روندتے ہیں لوگ روز و شب ، پتھر |
| نصیب کیسا ہے اُس کا ہر ایک چومتا ہے |
| ہے ایک کونے میں کعبے کے جو عجب ، پتھر |
| جہاں میں پھولے سماتا نہیں ہے وہ طارق |
| وہاں پہ چھُو گئے جس کے بھی دست و لب ، پتھر |
معلومات