| نَظمیہ غَزَل: تا حَیات اِسْتِثْنا!!! (حِصَّہ اَوّل) |
| —— |
| مُضْمَرات اِسْتِثْنا، واردات اِسْتِثْنا |
| گھات گھات اِسْتِثْنا، بات بات اِسْتِثْنا |
| جو جو دینے بنتے تھے خَتم ہو گئے یکسَر |
| جو جو دینے بنتے ہیں واجبات، اِسْتِثْنا |
| وہ جو ہو چُکے سَر زَد وہ جو ہونے والے ہیں |
| اُن سَبھی جرائم سے کُل نَجات، اِسْتِثْنا |
| بَس نَہ چلنے والوں کے روز روز کے سَجدے |
| اور زور والوں کی اِک صَلات، اِسْتِثْنا |
| اُن کو چُھوٹ دیتی ہیں آئے روز تَرْمِیمیں |
| ہَم سے عام لوگوں کو پُل صِراط، اِسْتِثْنا |
| فرق صاف ظاہر تھا، فرق صاف ظاہر ہے |
| ذات پات اِسْتِثْنا، چُھوت چھات اِسْتِثْنا |
| روز کی یہ تَرْمِیمیں اُن کے تو کِھلونے ہیں |
| اور ہَم غریبوں کا مُنکرات، اِسْتِثْنا |
| اِس میں کُچھ عَجَب کیا ہے مان کیوں نَہِیں لیتے |
| اُن کی جِیت اِسْتِثْنا، اَپنی مَات اِسْتِثْنا |
| کُچھ خَبَر نَہ ہو پائی، کُچھ سَمجھ نَہِیں آئی |
| کون دے گیا کِس کو رَاتوں رَات اِسْتِثْنا |
| (مرزا رضی اُلرّحمان) |
معلومات