| کتنے معصوموں کو دی تم نے سزا یاد نہیں |
| ظلم جی بھر کے نہتّوں پہ کِیا یاد نہیں |
| پا بہ زنجیر کیا جبر و تشدّد کر کے |
| ظلم کیا خُوں کے بہانے کے سوا یاد نہیں |
| دھمکیاں دینے کی آواز نہیں آتی یہاں |
| گونجا کرتی تھی جو گلیوں میں صدا یاد نہیں |
| اب مہاجر ہوئے لگتا ہے کہ صدیاں بیتیں |
| کیسی اب دیس میں چلتی ہے ہوا یاد نہیں |
| کیوں بھلا مانے کوئی عشق میں پاگل اس کو |
| جس کو معشوق کی کوئی بھی ادا یاد نہیں |
| میں نے کل رات ہی دھویا تھا اسے سجدے میں |
| کیسے دامن پہ پڑا داغ نیا یاد نہیں |
| اُس نے ہر موڑ پہ سیدھا تھا دکھایا رستہ |
| اب وہ کہتے ہیں کوئی راہ نُما یاد نہیں |
| وہ تو دشمن ہیں نہیں ان سے توقع کوئی |
| دوستوں کو بھی مرے گھر کا پتہ یاد نہیں |
| گاہے گاہے سہی اپنوں سے ملا کرتے ہیں |
| ان سے کیا شکوہ جنہیں رسمِ وفا یاد نہیں |
| میں نے طارق بڑی حیرت سے انہیں دیکھا ہے |
| ظلم کرتے انہیں کیا قہرِ خدا یاد نہیں |
معلومات