| ہر موڑ پر ہیں زیست کے منظر نئے نئے |
| ملتے ہیں راہ گیر یہاں پر نئے نئے |
| ۔ |
| آنسو کبھی خوشی کے کبھی غم کی داستاں |
| یہ زندگی کے پردے پہ منظر نئے نئے |
| ۔ |
| دم پھونکئے یا پھر کوئی تعویز دیجئے |
| کرتے ہیں ظلم ہم پہ ستم گر نئے نئے |
| ۔ |
| پتھر سے رشتہ شاخِ ثمر بار ہی کا ہے |
| کیکر پہ کون پھینکے ہے پتھر نئے نئے؟ |
| ۔ |
| اس نے کہا تھا اتنا کہ کہنی ہے ایک بات |
| اٹھنے لگے تھے دل میں کئی ڈر نئے نئے |
| ۔ |
| صیاد سے پرندے بھی ہیں یوں ملے ہوئے |
| لاتے ہیں کھینچ کے وہ کبوتر نئے نئے |
| ۔ |
| جی لگنے میں یہاں پہ مدثر، لگے گا وقت |
| آئے ہیں ہم گھر اپنا بدل کر نئے نئے |
معلومات