| غزل |
| رنج بھی راحت فزا ہیں نفس کی تسخیر میں |
| پھوٹتی ہیں راحتیں ہر حلقۂ زنجیر میں |
| اب مجھے ظلمات سے کوئی بھی اندیشہ نہیں |
| آئینہ دل کا مجلا ہے نئی تنویر میں |
| صرف اِک اسمِ محمدﷺ ہے وہ بس بعد اَز خدا |
| رُوح کو تسکیں ملے جس اِسم کی تذکیر میں |
| اِلتجا ہے یا الٰہی دے بصیرت کی نگہ |
| دیکھتی ہو جو نیا منظر ہر اک تصویر میں |
| گوشہ گوشہ اک نئی تنویر سے روشن ہوا |
| جب کبھی شامل ہُوا حُسنِ نظر تصویر میں |
| عشق نے پیدا کیاہے ہرجہانِ نو یہاں |
| کار فرما ہے جنوں ہر اک نئی تسخیر میں |
| منہ تِجوری کا کبھی بے سُود تو کُھلتا نہیں |
| لازماً کچھ فائدہ مُضمر ہے اِس تشہیر میں |
| کل زمانہ کھود لے گا آپ کا کھنڈر کہیں |
| کھوٹ گر شامل کرو گے آج کی تعمیر میں |
| سرفروشوں نے چُنا ہے خاص یہ مَقتل اگر |
| بات کچھ تو ہے یقیناً آپ کی شمشیر میں |
| چَین کی لِِیلا سُناتے ہیں نئی دہلی سے وہ |
| خُون پیہم بہہ رہا ہے وادیِ کشمیر میں |
| صد تفاخر سے شہاب احمد سناؤ تم غزل |
| رنگ غالب کا جھلکتا ہے تری تحریر میں |
| شہاب احمد |
| ۱۵ مارچ ۲۰۱۹ |
معلومات