| غزل |
| سَر سری دیکھیں گُل و گُلزَار ہے |
| زَخمِ دل ہم رنگِ لالہ زَار ہے |
| شُو خ و رَنگیں ہو بہاروں کی طرح |
| اَب ہمیں اَیسی خَزاں دَرکار ہے |
| خیر بانٹو خلق میں کُل بے طلب |
| زندگی بے فیض کی بیکار ہے |
| پیش منظر میں سبھی کٹ پتلیاں |
| ہاتھ اک شاطر پَسِ دَیوَار ہے |
| سَر زمینِ پاک کوئے یارِ مَن |
| بَر زبانِ خلق کوئے دار ہے |
| رَکھ شہاب احمد سنبھل کر ہر قدم |
| زیست کا یہ مرحلہ دُشوَار ہے |
| شہاب احمد |
| نومبر ۱۰ ۲۰۲۶ |
| رمل مسدس محذوف |
| فاعِلاتن فاعِلاتن فاعِلن |
معلومات