| آشوب و سر کشی کا سمندر لگا مجھے |
| ہر شخص اس جہاں میں ستم گر لگا مجھے |
| اتنا مہیب شہر کا منظر لگا مجھے |
| اب لب بھی کھولنے پہ بہت ڈر لگا مجھے |
| معصوم طِفل شہر میں ہنستے تو ہیں مگر |
| ان کی ہنسی بھی غم کا ہی ساغر لگا مجھے |
| جس کی خموشیوں میں نہاں اک ہِراس تھا |
| کم ظرف و بزدلی کا وہ خُوگَر لگا مجھے |
| اس درجہ دل نے مجھ کو جو رسوا کیا یہاں |
| دل بھی عدو کے جیسا ستم گر لگا مجھے |
| کس کو سناؤں میں دلِ بیمار کا گلہ |
| ہر اِنس اپنی شکل میں پتھر لگا مجھے |
| آنکھوں میں بس گئی مری دنیا کی رونقیں |
| پتھر گرا زمیں پہ تو جوہر لگا مجھے |
| آنکھوں سے جب انا کا کوہرا یہ چھٹ گیا |
| ادنی بھی تب سے اپنے برابر لگا مجھے |
| افسوس مجھ کو سب نے ہی ٹھکرا دیا یہاں |
| آ تو بھی آ کے آخری ٹھوکر لگا مجھے |
| حسانؔ تشنگی کو نہ میسر فرات ہے |
| صحرا کی مثل اپنا مقدر لگا مجھے |
معلومات