| خوف و دہشت ہی ہر سو چھائی ہے |
| ظلم نے دھاک یہ بٹھائی ہے |
| صرف تیرے کرم پہ تکیہ ہے |
| کام آتی نہ پارسائی ہے |
| اس کا نشہ نہ عمر بھر اترا |
| تیری آنکھوں نے جو پلائی ہے |
| دردِ دل ہے ہمیں عزیز از جاں |
| عمر بھر کی یہی کمائی ہے |
| تیز ہوتی ہے اشکباری سے |
| دل نے یہ آگ جو لگائی ہے |
| ہم تو غفلت شعار تھے ہی مگر |
| چوٹ دانستہ اب کے کھائی ہے |
| چار سو ظلم کا بسیرا ہے |
| سہمی سہمی سبھی خدائی ہے |
| دل کا آنگن بجھا بجھا ہی رہا |
| اب کے کیسی بہار آئی ہے |
| جان و دل کا قرار لوٹ لیا |
| کیسی تیری یہ نے نوائی ہے |
| پاس ہوتے بھی تجھ کو پا نہ سکے |
| ہائے کیسی یہ نا رسائی ہے |
| دیں کے بدلے خرید لی دنیا |
| بھاری قیمت بڑی چکائی ہے |
| جھوٹی عزت کو پانے کی خاطر |
| ساری شرم و حیا گنوائی ہے |
| اپنی قسمت پہ کیوں نہ ناز کروں |
| مجھ کو حاصل تری گدائی ہے |
| اس کی رونق تمام تر تم سے |
| ناز نے بزم جو سجائی ہے |
معلومات