| موسمِ جاں ہے، خزاں ہے، اے مری جاں تو کہاں ہے |
| رنگوں کی اک کہکشاں ہے، اے مری جاں تو کہاں ہے |
| / |
| عشق کی سرشاری میں، ہیں کہکشائیں محوِ رقصاں |
| وقتِ وصلِ عاشقاں ہے، اے مری جاں تو کہاں ہے |
| / |
| ابتدائے داستاں مانا کہ تو ہی تھی مگر اب |
| انتہائے داستاں ہے، اے مری جاں تو کہاں ہے |
| / |
| تو نے جس کو آسمانوں کے دکھائے تھے کبھی خواب |
| وہ زمیں پر تشنہ جاں ہے، اے مری جاں تو کہاں ہے |
| / |
| وہ جسے تو کہتا تھا جانِ جہاں جانِ بہاراں |
| خود پہ بھی اب وہ گراں ہے، اے مری جاں تو کہاں ہے |
| / |
| کب رکھے گی اپنے جادوئی قدم تو اس زمیں پر |
| منتظر سارا جہاں ہے، اے مری جاں تو کہاں ہے |
| / |
| اس دَیارِ اجنبی میں اس جہانِ بے بسی میں |
| ہر طرف شورِ فغاں ہے، اے مری جاں تو کہاں ہے |
| / |
| ہاں وہی میں ہوں، وہی جذبہ ، وہی دیوانگی ہے |
| زندگی بھی مہرباں ہے، اے مری جاں تو کہاں ہے |
| / |
| جو بسایا تھا کبھی ہم نے لہو سے، اس چمن کی |
| ہر کلی ماتم کناں ہے، اے مری جاں تو کہاں ہے |
| / |
| اب تو آ جا دیکھنے مجھ کو کہ یہ تیری جدائی |
| اک عذابِ بے کراں ہے، اے مری جاں تو کہاں ہے |
| / |
| میں یہاں دیکھوں، وہاں دیکھوں، جہاں بھی دیکھوں بس ایک |
| کاروانِ رفتگاں ہے، اے مری جاں تو کہاں ہے |
معلومات