| خوشی کی گھڑی ہے، عجب اک سماں ہے |
| کوئی بچہ، بوڑھا یا کوئی جواں ہے، خوشی سے نہاں ہے |
| فلک پر لگی ہیں سبھی کی نگاہیں، مرا ساتھ چاہیں |
| مگر میں پریشاں انہیں کیا بتاوں؟ |
| مرا چاند تو اِس فلک پر نہیں ہے |
| وہ رشکِ قمر تو زمیں پر کہیں ہے |
| مری عید جس سے، جو میری خوشی ہے |
| وہی جب نہیں ہے تو کیا زندگی ہے |
| مری زندگی کی شروعات اس سے اسی پر ختم ہے |
| غمِ زندگی ہے فراقِ صنم ہے |
| مقدر میں میرے ستم در ستم ہے |
| چھلکنے کو بیتاب یہ چشمِ نم ہے |
| ان آنکھوں کا پانی بھلا کیسے روکوں |
| میں کب تک سمیٹوں یہ انمول موتی |
| مری چشمِ نم کے کنارے کنارے |
| انھی کو چھپاتے انھی کو بچاتے |
| کہیں بہہ نہ جائیں یہ آنسو بچارے |
| کوئی دیکھ لے تو |
| اگر پوچھ لے تو میں کیا نام دوں گا محبت کو اپنی |
| یہ سب بے خبر ہیں مرے حالِ دل سے |
| بتاوں تو کس کو، چھپاؤں تو کس سے |
| مبارک ہے کیسی، گلے کیا ہے ملنا کوئی تو بتائے |
| کہ جب ہاتھ دل سے جدا ہو نہ پائے |
| مبشر کہو کیسے رسمیں نبھائے |
| یہ ماتم کناں عید کیسے منائے؟ |
معلومات