| ہر زخم کے خرام میں رہتا ہے لال رنگ |
| اشکوں کے اہتمام میں رہتا ہے لال رنگ |
| دکھ، درد، آہ، کرب، الم، چیخ اور اشک |
| تحریر میں،کلام میں رہتا ہے لال رنگ |
| غصے میں لال پیلے ہوئے میرے نام پر |
| یعنی کہ میرے نام میں رہتا ہے لال رنگ |
| سورج کو وقتِ شام کبھی ڈوبتا تو دیکھ |
| خوابوں کے اختتام میں رہتا ہے لال رنگ |
| لاشوں پہ رقص کرتے ہوئے جشن دیکھنا |
| ہر عہد کے نظام میں رہتا ہے لال رنگ |
| ویران بستیاں ہوں کہ جلتے ہوئے چراغ |
| پایا کہ ہر مقام میں رہتا ہے لال رنگ |
| دن شام تک گزار کے مقتل میں، رات کو |
| خاکسترِ خیام میں رہتا ہے لال رنگ |
| میری ہر ایک صنف میں ہر رنگ ہے مگر |
| اک شاہ کے 'سلام" میں رہتا ہے لال رنگ |
| (ڈاکٹر دبیر عباس سید) |
معلومات