| جتنے مجرم یہاں پہ آتے ہیں |
| جیل جاتے ہیں چھُوٹ جاتے ہیں |
| چھوڑ کر مجھ کو جانے والے کے |
| میرے دُشمن سے گہرے ناتے ہیں |
| یہ خرابی مری نظر میں ہے |
| بے وفا ہی نظر کو بھاتے ہیں |
| مجھ کو کہتے تھے شاعرِ ناکام |
| اب مرے شعر گنگناتے ہیں |
| جھُوٹ غیبت زنا دل آزاری |
| ایک آدم ہے کتنے کھاتے ہیں |
| بھُوک سر پیٹ پیٹ روتی ہے |
| دَھن پہ لاشے سجائے جاتے ہیں |
| لاشیں گلیوں میں سڑتی گلتی ہیں |
| رہنما سُن کےمسکراتے ہیں |
| اب مغنّی کہاں رفیع جیسے |
| سارے مطرب اسے چراتے ہیں |
| جب طبیعت کبھی ہو مائل تو |
| ڈھیروں مضمون دِل میں آتے ہیں |
| گرچہ بندھن تو توڑ ڈالے پر |
| بیتے لمحے بہت ستاتے ہیں |
| وہ جو چلتے ہوئے نہ تھکتے تھے |
| اب وہی پاؤں ڈگمگاتے ہیں |
| مضمحِل ہو گئے قویٰ غالب |
| مرزا صاحب بجا فرماتے ہیں |
| قبلہ ناصح موازنہ نہ کریں |
| ان کی راتیں ہیں میرے راتے ہیں |
| کس طرح ختم ہو غریبی امید |
| اک کماتا ہے سارے کھاتے ہیں |
معلومات