| کچھ تخیّل کو یوں اڑا لے جاؤں |
| عرش تک اپنی میں صدا لے جاؤں |
| ابرِ رحمت ہے مجھ پہ جو برسا |
| شُکر کے بحر میں بہا لے جاؤں |
| یہ نہ ہو بوجھ ہوں بہت بھاری |
| جو گناہوں کے میں ، اٹھا لے جاؤں |
| فضل یوں مجھ پہ رب کا ہو جائے |
| کوئی نیکی ہو جو کما لے جاؤں |
| جانتا ہے سفید پوش ، غریب |
| اُس سے جنّت کا ہی پتا لے جاؤں |
| آخرت کی بھی کوئی فکر کروں |
| یا کہ دنیا کا ہی مزا لے جاؤں |
| کچھ ندامت کے مارے بہہ نکلے |
| اشک پلکوں پہ ہی سجا لے جاؤں |
| چند گھڑیوں کا ہے قیام یہاں |
| سوچتا ہوں یہاں سے کیا لے جاؤں |
| جس پہ راضی ہو وہ مرا ملجا |
| اک محبّت وہی بچا لے جاؤں |
| مختصر سی مری تمنّا ہے |
| عہدِ بیعت کو میں نبھا لے جاؤں |
| دل کی گہرائی سے اٹھے طارقؔ |
| چاہتا ہوں کہ وہ دُعا لے جاؤں |
معلومات