جسم جب تیر سے کمان ہوا |
ہر تعلق بلائے جان ہوا |
بے رخی نے جنم دیا ہے درد |
ہجر کی گود میں جوان ہوا |
میں بھی غمگین ہوں مگر جتنا |
بعد تیرے مرا مکان ہوا |
کس پہ برسی وصال کی بارش |
آسماں کس پہ مہربان ہوا |
اک نظر تیرے دیکھ لینے سے |
دل مرا کشتِ زعفران ہوا |
سانس لینا بھی ہے سزا جیسا |
جسم پر درد حکمران ہوا |
اشک جب قیدِ ضبط سے نکلا |
حالتِ دل کا ترجمان ہوا |
ایک گل سے مہک تری آئی |
اک کلی پر ترا گمان ہوا |
روح اور جسم کی لڑائی تھی |
عشق ڈوبا کہ درمیان ہوا |
فکر کیا ہے فراق میں سر پر |
چھت ہوئی یا کہ آسمان ہوا |
مختصر قصۂِ وفا آسی |
جب سنایا تو داستان ہوا |
معلومات