| غم ہجراں کے زنداں سے۔۔۔ |
| مجھے اک گیت لکھنا ہے |
| ملن کی آخری شب پر |
| کہ جس کو گنگناؤں تو |
| دلِ مضطر بہل جائے |
| غمِ ہجراں کے زنداں سے |
| کبھی کچھ پل نکل پائے |
| مگر میں لکھ نہیں پاتا |
| محبت سے بھری باتیں |
| شب قربت کی سوغاتیں |
| ہماری زیست کا حاصل |
| وہ سب لمھے وہ سارے پل |
| میں جب بھی یاد کرتا ہوں |
| میں جب بھی لکھنا چاہوں تو |
| فضائے درد کمرے میں اتر آئے |
| ملن شب کی حسیں یادیں |
| شبِ فرت میں ڈھل جائیں |
| فراقِ یار کا خنجر |
| رگِ جاں میں اتر جائے |
| دلِ مضطر تڑپتا ہے |
| غمِ ہجراں کا دریا |
| اشک بن بن کر |
| مری آنکھوں سے بہتا ہے |
| ورق بھی بھیگ جاتا ہے |
| قلم بھی چھوٹ جاتا ہے |
| میں کچھ بھی کہہ نہیں پاتا |
| میں کچھ بھی لکھ نہیں پاتا |
| ہزاروں بار کوشش کی |
| یہی ہر بار ہوتا ہے |
| ملن کی آخری شب پر |
| مجھے اک گیت لکھنا ہے |
| مگر میں لکھ نہیں پاتا |
| غمِ ہجراں کے زنداں سے |
| میں باہر آنہیں پاتا۔ |
معلومات