| دیار غیر میں یوں بر سر پیکار ہے زینب |
| ترے آگے ستم کا ہر ہنر بیکار ہے زینب |
| سنا ہے شام میں کچھ اس طرح بیدار ہے زینب |
| کہ اب سونا یزید نحس کا دشوار ہے زینب |
| زمینوں پر زمانوں پر زمانے کی ہر اک شئ پر |
| تری سرکار ہے زینب تری سرکار ہے زینب |
| ادھر تشہیر کی تیاریاں ہیں اور ادھر دیکھو |
| کہ فتح شام و کوفہ کے لئے تیار ہے زینب |
| طناب خیمۂ صبر و رضا ہل ہی نہیں سکتی |
| ستم کی قوتیں اس پار ہیں اس پار ہے زینب |
| غذائے سفرۂ ملعون پہ پھولا پھلا جو بھی |
| ترے مد مقابل وہ بشر لاچار ہے زینب |
| زبان اسکتوا نے منجمد ماحول کر ڈالا |
| مزاج کن یکن کا بے مثل شہکار ہے زینب |
| اسی خاطر تو توڑے جا رہے ہیں آئینہ خانے |
| یزیدی شیش محلوں پر ترا جو وار ہے زینب |
| ابھی بولی لگے گی کوڑیوں میں فتح ظالم کی |
| کوئی دربار میں کہہ دے سر بازار ہے زینب |
| وقار سلطنت کی لاش کے ٹکڑے نہیں ملتے |
| فنون ضرب میں یارو عجب فنکار ہے زینب |
| یہاں بھی فاصلہ ما بین بس قوسین پاؤ گے |
| امامت سن رہی ہے اور تری گفتار ہے زینب |
| عجب شور خموشی ہے زمانہ محو حیرت ہے |
| خدا کی خلق پہ ایسے تری سرکار ہے زینب |
| لصیق خاندان آل احمد کیا سمجھ پائیں |
| کہ جو تاریخ میں بی بی ترا کردار ہے زینب |
| ستم زعم ظفریابی میں ایسی نیند سویا ہے |
| خبر اس کو نہیں ہو پائی کہ بیدار ہے زینب |
| سکوت عابد بیمار سے خوش فہمی مت پالو |
| امامت کی قیادت میں سر پیکار ہے زینب |
| قلم تو بک چکے تھے پھر بھی لکھنا ہی پڑا ان کو |
| "پس کرب و بلا شبیر کا انکار ہے زینب" |
| ظہیؔر کج سخن کی دسترس میں ہے نہیں ہرگز |
| وہ لفظیں لکھ دے جن کی اصل میں حقدار ہے زینب |
معلومات