یہ ہوش و خرد یہ دل قدمِ نبی میں بچھا بچھا کے کہیں

“ بلائیں کبھی تو در پہ ہمیں “ نگاہیں جھکا جھکا کے کہیں

فدا ہیں تمھارے ، سرمۂ خاکِ طیبہ لگا لگا کے کہیں

لبوں پہ سجا تمھارا ہی نام ، اشک بہا بہا کے کہیں

ہماری دوا کوئی تو کرے ، کہیں تو سکوں عطا ہو ہمیں

فگارِ عطائے اہلِ دؤل، نبی کو دکھا دکھا کے کہیں

سجو کہ ہے آج عازمِ لامکاں وہ حبیبِ ربِّ جہاں

وہ حور و ملک یہ باغِ جناں ، فلک کو سجا سجا کے کہیں

رسول و نبی امامِ رسل کو آج کریں ادب سے سلام

“و نحنُ فی اقتِداءِ حبیب” صف وہ بنا بنا کے کہیں

براق کو آرزو یہ کہ لوں ، بناز میں بوسۂ قدمین

“فداکَ فداکَ “ کیف ، نبی کی نعل اٹھا اٹھا کے کہیں

وہ باغِ جناں یہ رونقِ کن فکاں گلِ انبیا سے سجے

وہ کم ہے خدا سے ، خلقِ خدا سے اس کو بڑھا بڑھا کے کہیں

مدینے سے لے چلو نِعمِ بہشت کی تم بہارِ کرم

فلک سے ملک ہمیں درِ مصطفی پہ بلا بلا کے کہیں

امان یہاں پہ ہاں ہے امان صرف یہاں بروز جزا

بدوں کو شفیع ظلِّ مزمّلی میں چھپا چھپا کے کہیں

وہ لوگ ہیں مبتلائے عناد ان پہ خدا کرے ہے عذاب

جو رفعتِ شاہِ کون و مکاں حسد میں گھٹا گھٹا کے کہیں

کبھی جو گدا امیرِ حرم کے روضۂ پاک پر پہنچیں

طبیبِ امم کو پھر غمِ دل وہ اشک بہا بہا کے کہیں

فراق کی لذّت اپنی جگہ مگر ہے ہمیں بھی دید کا شوق

غلامِ کرم کے دل کا پیام ان کو سنا سنا کے کہیں