| چراغوں کے ہوتے ہیں شب بھر خسارے |
| ہماری ہوا سے نہیں بنتی پیارے |
| تجھے کیا خبر کیا ملا اس سفر سے |
| یہ بستی یہ جنگل یہ رستے نکھارے |
| خضر ایک ایسا میسّر ہو کوئی |
| ہمیں عشق کی منزلوں سے گزارے |
| جو اسرارِ ہستی کو عریاں دکھائے |
| سرِ بزم جو یار کا رُوپ دھارے |
| یہ اک خانقاہ و مجاور بہ دریا |
| بقا کے سفر کے ہیں یہ استعارے |
| نجانے کہاں تک لے جائے گا تُم کو |
| فقط اک مسلسل تعلق دُلارے |
| نہ کمتر نمو میں، نہ افکار میں ضد |
| یہ کاشفؔ کی پرواز کے ہیں ستارے |
معلومات