کشتی تو ابھی کنارے سے بندھی ہوئی تھی
ذرا سی ضد کی ہوا چلی
اور ہم دونوں نے چپّو رکھ کر ہاتھ باندھ لیے!
میں کھڑکی کے اس پار کھڑا سوچتا رہا:
"دروازے کی کنڈی تو اس نے لگائی تھی، پہل وہ کیوں نہ کرے؟"
اور وہ اس پار بیٹھی انگلیوں سے میز پر لکیریں کھینچتی رہی:
"آواز تو میں نے دی تھی آخری بار، اب وہ کیوں نہ پکارے؟"
عجیب ضد تھی—
دونوں اپنی اپنی اکڑ کو
خود داری کا نام دے کر مسکراتے رہے!
دیکھتے دیکھتے
کشتی کنارے سے کھل کر بہنے لگی
لمحوں کی لہر نے ہمیں اتنا دور لا پٹخا
کہ اب آواز بھی دیں تو پانی میں ڈوب جاتی ہے!
اب دونوں اپنے اپنے ساحل پر
اپنی جیت کی تسبیح لیے بیٹھے ہیں—
بس درمیان میں وہ کشتی کہیں نظر نہیں آتی
جس میں بیٹھ کر ہمیں ساتھ پار اترنا تھا!

0
3