| نہ وضعِ حرف ہی بدلی نہ اندازِ بیاں بدلا |
| زمیں بدلی نہ ہم بدلے نہ رنگِ آسماں بدلا |
| عتاب و خشم و جوش و غصّہ و طیش اب بھی ہے یا کچھ |
| عتاب و خشم و جوش و غصّہ و طیشِ بتاں بدلا؟ |
| سیاست سے ہمیں وابستگی ہے اس قدر یعنی |
| کسی نے شور ڈالا، سُن گیا، اک حکمراں بدلا |
| محلّہ دل کا غیر آباد تھا، تم نے کیا آباد |
| وصال و ہجر یک صورت، یہاں سے واں مکاں بدلا |
| گئے دن بادیہ پیمائی کے مجنوں! تمھارے سنگ |
| گرفتارِ چمن ہونے کو تھے سو رازداں بدلا |
| جفا کی خُو گئی، وہ مہرباں ہونے لگا ہم پر |
| سو مایوسی ہوئی، تھک ہار کر نامہرباں بدلا |
| جو پہلے دل تھا اب سر ہو گیا اس ظلم پیشہ کا |
| وہی تیرِ نگہ، ابرو کماں، اس نے نشاں بدلا |
| سرِ بازار رازِ دوستی کُھلنے ہی والا تھا |
| بہت مشکل کہیں جا کر سخن زیرِ زباں بدلا |
| جو آئے، آئے بھی تنہاؔ، گئے بھی تو گئے تنہاؔ |
| جنم سے نزع تک روئے، نصیب اپنا کہاں بدلا |
معلومات